Tuesday, January 16, 2018

على مين بترفعوا الاسعار؟

على مين بترفعوا الاسعار؟


 لو تعرف انه بالطفيلة وعجلون الناس بشغل الصوبة ساعتين باليوم بس.. وباقي اليوم بقضوها متلهمدين بالحرامات ومطربقين البواب عشان جرة الغاز تسلكهم اسبوعين زمان

لو.تعرف اهل قرى اربد بتفقدوا ضو الدار عشر مرات باليوم عشان ماتزيد فاتورة الكهربا..

لو تعرف بجرش بولعوا بدل الحطب جفت زيتون والولاد بتخنقوا من الريحه.بس عشان يوفروا..

لو تشوف حارات المفرق بتتحول لمدينة اشباح بعد صلاة العشا لانو الكل بدو يوفر كهربا..

انت بس بتعرف جماعة دير غبار وعبدون ودابوق اللي العسكر حاميه بيوتهم ؛ انت مفكر هظول الاردنية؟

 البنت ولا الولد بوخد صراف البابا وبسحبلة 500 ليرة عشان يسهر ويأرجل مع اصحابه بتاج مول .

البنت بتارجل بعبدون بقعده وحدة بقد راتب عسكري..

لاتروح مفكر هظول اللي غنوا عنهن حنا الاردنيات هيه بهيه


 شو مدريك عن اللي بروح يلم حطب ولا ينظف صوبة البواري بس تشمس عشان ما تقطب جوا الدار

 انت مابتعرف الا جماعة اللي بعبوا صهاريج الديزل كل شهر..

فكرك هظول الأردنيين؟

 شو مدريك عن قرى تبنه ولا عنجره ولا كفر خل ولا الغور ولا زي وعلان ولا قرى ذيبان ولا العالوك ولا فقوع ولا المشيرفه ولا ذهيبه ولا بصيرا ولا قرى النعيمات ولا القويره؟

 اخ لو تمشي سيارتك بيهن يوم.. عليّ الجيرة الا تكشنت وتطلب تروح طيران ..

انت بتدري انو العالم صارت تلم وتجمع خبز يابس وتبيعه عشان تعطي الولد.مصروف للمدرسه بتدري انو صاروا يلموا خرده ع عربايه ليسترزقوا فيهن..


شو مدريك عن طلاب جامعاتنا كيف بدبروا قسط الجامعة.. ولا مفكرهم مثل اولادكوا جبتولهم جامعات اجنبيه لعندهم لانو خايفين تخلوهم يبعدوا عن عين الماما..

بتدري عن محل الخضرة اللي بداين العالم لاخر الشهر ولا اللحام ولا تاع الدكانه؟

 بتدري انو الناس صارت تشحد بس خبز ع باب المخابز؟

 بتدري انو اهل الغور بتسمطهم الشمس عشان يومية 5 ليرات؟

 وبالاخر حضرتك ما بتشتري خضرة الا من السنترو والكوزموا

 بتدري انو النسوان مهددات بالحبس عشان قروض المرآه لانها اخذته عشان تخطب.ابنها العسكري؟

 بتدري انو راتب العسكري 350 ليره هاظ اذا مالحقه خصم لانه اتاخر ع الدوام عبين ما دبر اجار الطريق؟

 بتدري انو الناس قطعت حالهم ب الباله وانت مشغول مع اللي بفصلك.بدلاتك ع اخر طراز؟

 بتدري انو في ناس ما بتعرف تستخدم الصراف الالي؟

 بتدري انو في ناس بتسري قبل دوامها بساعتين عشان ما تتاخر بالمواصلات؟

 بتدري عن العيال اللي بالمول اللي بصيروا يلعبوا ع درج الكهربا ؟ لانهم اول مره.بشوفوه ولا بفكروه ملاهي

 بتدري عن اللي صارلهم سنين وسنين بستنوا الوظيفه.؟

 بتدري انو صار الشب يستحي بقول لابوه بدي اتجوز ؟

 لانو لا الاب معه ولا الابن قادر يستر حاله

 بتدري انو في ناس ما معها تشتري حبة ريفانين من الصيدلية لانها غشيمه مفكرة ريفانين ولا اسبرين بسكت وجعها؟؟ ولا مفكر جماعة المستشفيات الخاصه همو الاردنيه؟


 عمرك فتت مول عامل عروض ع المواد التموينيه وشفت العالم كيف بتقطع بعض؟

 ولا جماعة اللي بوصوا السنتروا ولا كوزموا ع اغراضهم لاتروح مفكر هظول الاردنيه

 لاتروح مفكر الاردني معه كم جنسيه لان ضاقت بحتار ع اي دوله يسافر؟

 فكرك هظول صحاب حسابات سويسرا اردنيه؟

 الاردني راتبه يادوب يملطه ل 10 الشهر 

 وبعدها بصير يداين عشان يعيش

الاردني هو حاميها...

الاردني نظيف لانو ماسرق ونهب 


 الاردني نفسه عزيزه .

Sunday, January 7, 2018

كن شيئاً جميلاً فالكل راحل

لا يمكنك أن ترى صورتك في الماء وهو يغلي وبالمثل لا يمكنك أن ترى الحقائق وأنت غاضب

لا تغضب....

قد تسكن قصراً وتضيق بك الحياة، وقد تسكن جحراً ويشرح الله صدرك ، قد يكون لك إخوة وتعيش وحيداً ، وقد تكون وحيداً وحولك إخوة ، قد ترى الأصدقاء يطعنون ظهرك ، وقد ترى الأعداء ينقذون حياتك وقد ترى أغنياء يرتشون ، وقد ترى فقراء يتصدقون . لهذا سميت دنيا !

إحسانك وتعاملك لا ينسى ، فلا تندم على لحظات أسعدت بها أحداً ، حتى وإن لم يكن يستحق .

كن شيئاً جميلاً فالكل راحل .. !!